Gurutzegrama geometriko-aritmetiko-logikoa

Irudia jarriz hasiko naiz, eta gero azalpenei helduko diet:

Hana Murray-ri twitterren hartutako irudia

Oinarrian gurutzegrama bat da irudian daukaguna. Helburua da lerro eta zutabe bakoitzean hexagono bana eratzeko adina fitxa kokatzea. Bloke geometrikoak ezagutzen dituzuenek identifikatuko zenituzten piezak. Horrek esan nahi duena da ariketa bera blokeen laguntzarekin egin ahal izango duela hala behar duenak.

Bloke geometrikoak luze eta zabal aztertu izan ditugu gure webgunean eta artikulu sorta zabala egitera ere iritsi ginen bere momentuan. Izan ere, ezinbesteko materialeen zerrendan agertzen dira blokeok, oso erabilgarriak izan baitaitezke matematikaren aspektu ezberdinetan; ez geometrian bakarrik. Hemen jarriko dizkizuet artikulu esanguratsuenetarako loturak begiratua egin nahi badiezue ere:

Gaurko ariketara bueltatuta, esan dezakegu aberastasun matematiko handikoa dela. Segun eta zein ikuspuntutik begiratzen dugun badu ikutu geometrikoa, ikutu aritemtikoa eta nola ez logikoa. Altxor txiki bat!!

GEOMETRIATIK BEGIRATUTA

Lana hexagonoak osatzea denez, ezer gutxi geratzen da gehitzeko. Alde horretatik LH2-3-4-5n egiteko modukoa da ariketa, zailtasunaren arabera. Errazagoa egingo zaie ariekta hexagonoa bloke geometrikoekin eratzeko aukerak lehenago esploratu badituzte.

LOGIKATIK BEGIRATUTA

Gurutzegrama egiteak nolabaiteko koordinazioa egon dadin zaintzera behartzen gaitu. Lauki bateko elementua lerro eta zutabe baten partaide den heinean, bietarako egokia den pieza bilatu beharko dugu eta horrek inplikazio logikoak ditu. Saiakuntza-errorea prozedurak praktikan jarri behar izaten dira modu ordenatuan. Zorionez, ariketa hauek emaitza bat baino gehiago onartzen dutenez, errazagoa izango da pieza egokiak topatzea.

ARITMETIKATIK BEGIRATUTA

Jarduera honetan, hala nahi bada, zatikiekin eta haien arteko eragiketekin egiten da topo; eta gehiago zukutuz, ekuazioen ebazpenarekin ere bai. Lehenengoak LH6 edo DBH1en kokatuko gaitu eta bigarrenak DBH2 edo 3an. Gurutzegramaren ariketa aspektu honein lotu baino lehenago, hala ere, irudikoa bezalako hausnarketak egin beharko dituzte ikasleek; bloke geometrikoak zatikiekin erlazionatzekoak, alegia.

BETE DEZAGUN HASIERAKO GURUTZEGRAMA!!

Hau guztia ikusita, goaz hasierako gurutzegrama ebaztera.

Lehenengo zutabean 1/3+1/2+1/6=1 eragiketa egin dugu.

Irudian lehenengo zutabea bete dugula ikusi daiteke, eta bertan atera zaigun zatikien arteko eragiketa ere idatzi daiteke. Lehenengo lerrora begira jartzen bagara, umearen mailaren arabera 3 modutan arrazoitu ahal izango da egoera:

LH2-3-4koak: Hexagonoa osatzeko “pieza gorria” falta dela arrazoitu ahal izango du, blokeak eskuekin erabiliz hala behar bada.

LH6-DBH1ekoak: 1/3 eta 1/6 erabilita gorria falta dela , 1/2 alegia, esan ahal izango du.

DBH2-3koak: Ekuazio bezala idatzi ahal izango du: 1/3+1/6+x=1 Ezezagunaren balioa askatzeko zatikien arteko eragiketa egin beharko du.

Interesgarria, ezta? Pentsa zein ederra izango litzatekeen ikasturte ezberdinetako irakasleak koordinatuta jokatzea eta urtez-urte ariketa bera ikuskera ezberdinekin aberasten joatea.

Bukatuko al dugu gure gurutzegrama?

Konturatuko zineten gurutzegrama bera egiteko modu ezberdinak daudela, ezta? Ba hori ere zukutu daiteke, jolasa sortu baitaiteke erabilitako piezak minimizatzeko joera proposatuz, edo ahal den pieza urdin gehiena erabiltzeko esanaz…

Goiko gurutzegrama bezalako gehiago jarri ditu Hana Murrayk erabilgarri eta hona ekarri ditugu inprimatzeko moduan jarriz:

Permanent link to this article: https://matematiketan.eus/2019/04/04/gurutzegrama-geometriko-aritmetiko-logikoa/

Utzi erantzuna

Your email address will not be published.